الشيخ وأم أحمد والموكب والرئيس

في أحدى لقاءات برنامج شاهد على الثورة على قناة الجزيرة مباشر مصر , ربما يكون هو اللقاء الوحيد للبرنامج لأني لم أشاهد غيره كما يتم إعادته تقريباً يومياً .

المهم

البرنامج من تقديم أحمد منصور أما الضيف فكان الداعية السابق الناشط السياسي الحالي الأستاذ صفوت حجازي .

عن لسان الحاج صفوت وعن المشاهد والمواقف التي حاصرته في ميدان التحرير خلال الثمانية عشر يوماً التي هي عمر " الثورة "

قال: يوم 29 يناير الصبح لقيت واحدة ست جايالي بتدور عليا ماهو أنا الوحيد اللي كنت معروف في الميدان وقتها قبل بقى ما ييجوا الناس التانية

" وعدد اسماء حوال سبعة أشخاص آخرين معظمهم ممثلين "

الست جايه ورافعة في إيدها كرتونة مكتوب عليها بالقلم الجاف لن أرحل حتى يرحل مبارك , سألتها خير يا ست في أيه قالولي إنك بتسألي عليا ...؟؟؟
ردت قالتلي : أنا ليا تااااااااار .... تاتاتاتاتاتنننننننن
قلتلها خير طيب احكيلي
قالت

" الرواية على لسان الداعية السابق "

أنا اسمي أم أحمد , خدت دبلوم تجارة واتجوزت وأنا عندي عشرين سنة من راجل فاضل كان نفسنا زي أي زوج وزوجة في طفل نسميه أحمد وبنت

" مش فاكرة بصراحة كانت عايزة تسميها ايه "

لكن ربنا مأرادش وفضلنا عشر سنين نجري ورا الدكاترة والتحاليل والعمليات لكن كانت النتيجة كل مره واحده وهي إن أنا وزوجي عقيمين ومش مكتوب لنا نخلف أبداً .
بعد عشر سنين وبعد ما يئسنا وبطلنا خلاص ندور على الخلفة وسلمنا لمشيئة ربنا حصلت المعجزة وأنا عندي أربعييين سنة .... تيراراررا تررررررا
فجأة لقيتني حامل مصدقتش نفسي ولا زوجي كان مصدق ولا حد أبداً كان يتخيل ....... ولكنها إرادة الله
لدرجة إني كنت كل يوم أقعد أبص لبطني أتحسسها وهي بتكبر يوم بعد يوم أحاول استوعب اللي أنا فيه وبرضوا مكنتش مصدقه ....
لحد ما جه اليوم وجاتني آلام الولادة .... تن تاااااااااااااااااااااااان
خدني جوزي وجري بيا على مستشفى الجلاء للولادة لكن وبعد ما طلعنا كوبري 6 أكتوبر لقينا الكوبري واقف ...

" بصراحة الحاج صفوت محددش هم كانوا طالعين على كوبري 6 أكتوبر من إتجاه مدينة نصر والا المهندسين "
المهم والكلام للحاج صفوت عن لسان أم أحمد : لقينا الكوبري واقف علشان كان معدي

" طبعا حُسني اللي كان معدي "

كان رايح 6 أكتوبر

" أنا مش عارفة هو كان رايح يعمل ايه في 6 أكتوبر , طب كان خد الدائري أسهل والا والا هو يعني علشان يروح 6 أكتوبر لازم ياخد كوبري 6 أكتوبر علشان يليق مع البدلة ...!!! رئيس غريب بجد "

نكمل حكاية صفوت أحنا وصلنا لحد فين ...؟؟
آه كان الكوبري واقف علشان هو كان معدي , وفضل الكوبري واقف وآلامي بتزيد وأبو أحمد مش عارف يعمل ايه , عدت ساعة والكوبري واقف ومفيش حد يساعدني , في الساعة التانية الكوبري واقف والقرن طش

" طبعاً صفوت مقالش القرن طش دي , دي بصراحة من عندي لزوم الحبكة الدرامية "

بعد تلات ساعات نزل أبو أحمد يجري يسترجى الظابط علشان يسمحلنا بالمرور كلمه من هنا وكلمه من هنا حصلت ما بينهم خناقة والظابط رقعه بالقلم

" وهنا يتحشرج الكلام في فم الحاج صفوت ويختنق صوته وتترغرغ عيناه بالدموع " لاا لاا لاا لاا لالالالاا
رجع أبو أحمد وأنا قاعدة لوحدي في العربية

" يعني عندهم عربية أهو والأشية معدن "

رجع مكسور مجروح

"رجع بإيده فاضيه طب كان جابلك كيلو موز وهو جاي دا انتي حتى نفسة "

رجع أبو أحمد والدموع في عنيه ومرضيش يزعلني ولا يحكيلي على اللي حصل مع الظابط

" طب انتي عرفتي منين يا أم أحمد أفهم بقى عرفتي منييين ...؟؟؟ "

رجع أبو أحمد بعد أربع ساعات لقاني غرقانة في دمي وطفلي واقع تحت مني في دواسة العربية ولسه متعلق بالمشيمة ببطني

" ويختنق صوت الشيخ أكثر فأكثر وتنزل من عيناه دمعة ساخنة وتدخل الكاميرا فوكسينج على وجه أحمد منصور لنجده يحاول التأثر هو الآخر ماهو مش معقول صفوت يعيط وأحمد يقعد كده يتفرج عليه ده حتى الناس يقولوا عليه معندهوش دم "

وبعد خمس ساعات الكوبري اتفتح ونزلنا نجري على المستشفى يحاولوا ينقذوني أنا وإبني لكن أمر الله كان نفذ ومات أحمد .

"رحمة الله عليه , أجر وعافيه يا أم أحمد جزء منكِ سبقكِ إلى الجنة "

وبعد تلات سنين مات أبو أحمد من حسرته

" بصراحة صفوت موضحش من حسرته على أحمد والا على القلم اللي لزقهوله الظابط "

وفضلت أنا لوحدي في الدنيا دي وجيت ... جيت هنا علشان أنتقم من اللي ظلمني وأهرني وقتل جوزي وإبني

"وهنا يسكت الشيخ عن الكلام المُباح ويدرك المصريون الصباح "


ياعم الشيخ صفوت الله يرحم والديك انت بتكلم هنود والا عالم مختومة على قفاها , أنت فاكر الدمعتين اللي أنت دمعتهم دول والحكاية الفكسانة اللي أنت حكيتها دي يعني دخلت علينا مرهمتنا انت باستخدامك لكل عوامل الظلم في البلد ابتداء من مواكب الرئيس لضعف الخدمات الصحية في مصر لجبروت رجال الشرطة .

محدش قالك يا عم الحاج إن الموكب الرئاسي عمره عمره عمره مبيوقف الشارع لأكتر من نصف نقول ساعة وبعدين يفتح , جبت بقى حضرتك الخمس ساعات اللي وقفتهم أم أحمد دول منين ....؟؟؟؟

طيب سيبك من دي , الريس رايح 6 أكتوبر وهيستخدم كوبري 6 أكتوبر الكوبري بيتقفل يا عم الحاج من تحت من مطلع الكوبري يعني محدش بيطلع عليه أساساً والا هم العربيات هتطلع الكوبري وتتشعلق فوق وبعدين يقفلوا الكوبري والريس يعدي من تحق عقب الباب ...!!!

وبعدين يا حاج صفوت في حاجه اسمها لجان شعبية لما تكون في حالة زي كده الستات بتتلم ويمكن ربنا ينصفها وتلاقي في الوقفة دي دكتور يساعدها والا لا مؤاخذة داية والا أي حد يولدها إنشالله ليلى علوي في فيلم إشارة مرور أو هند رستم في فيلم بين السماء والأرض ... معلش نسيت انك داعية إسلامي "سابقاً" ومش بتتفرج على التليفزيون , إنت تطلع في التليفزيون تجعجع وتفتري على خلق الله وتحرق دم الناس وبس .


وأخيرا يا عم صفوت

الشعب يريد رؤية الست أم أحمد وسماع حكايتها بالتفصيل
ولو طلع الموضوع صحيح عن نفسي هفتحلها صفحة عالفيس بوك اسميها

" معاً لترشيح أم أحمد لرئاسة الجمهورية "

بيقولوا ...!

: ده ياما أذى ناس كتير وعذب ناس كتير وقتل ناس كتير وسجن ناس كتير وكل ده بدون ذنب


: انت اتعذبت والا اتسجنت والا اتأذيت في عهده ...؟؟؟

: لاء

: طيب حد من إخواتك أو قرايبك اتأذى والا اتسجن والا اتعذب في عهده ...؟؟؟

: لاء

: طب من معارفك أو جيرانك أو أصدقائك  ...؟؟

: لاء

: طب مثلا مثلا قابلت حد في يوم من الأيام مقابلة عابرة ولو في أتوبيس نقل عام وحكالك انه اتأذى والا أتسجن والا أتعذب في عهده هو والا حد من قرايبة أو معارفه أو جيرانه أو أصحابه ..؟؟

: لاء

: طيب حضرتك لما لا أنت ولا حد من إخواتك أو قرايبك أو معارفك أو جيرانك أو أصحابك أو حد قابلته في أي حتة أو أي وقت لما ولا واحد من دول اتأذى أو اتسجن أو اتعذب في عهده , حضرتك جبت المعلومة دي منين ...؟؟؟

: بيقولوا

: أهاااااااااااااااااا  بيقوووووووولوا  !!!!!!!!!

أغنية ...!!

النهاردة كنا معزومين على الإفطار عند أحد أقاربنا في مدينة الإسماعيلية .

في الطريق مررت بالطبع على المركز الطبي العالمي .. تعلقت به عيناي بالضبط كما كانت تتعلق بمستشفى شارم الشيخ الدولي أثناء زيارتي لمدينة شارم الشيخ شهر مايو الماضي , اختنقت وامتلئت عيني بالدموع وأحسست بوخذة في قلبي ووجع في كامل جسدي , انهمكت أداري دموعي , أمسحها من أسفل نظارتي الشمسية حتى لا يراني زوجي فيقلبها " دراما " ...

انتبهت فإذا بصوت شيرين أحمد ينطلق من محطة نجوم أف أم في أغنية " المراية " وكانت انتباهتي بالتحديد عند المقطع الذي يقول : هو انت مين اللي عمل كده فيك ... مش إنت والا في حد غمى عنيك ...!!!


بعدت بنا السيارة عن المستشفى فجلست أكمل أذكار المساء , أستغفر الله لي ولأبوي والمسلمين





 

هو في ايه ..؟؟؟!!!

حوادث السرقة في مصر اليوم أصبحت على قدمٍ وساق ستة حوادث سرقة سمعت عنها هذا الأسبوع فقط معظمها حوادث سرقة سيارات .

1- سرقة بيت شقيق زوجي بعد رجوعه من بيته في الساحل الشمالي وجد بلكونة الشقة مكسورة ومسروق مبلغ 10 آلاف جنيه ومصوغات زوجته ....!!!

2- حالة سرقة شاهدها زوجي بعينه في المهندسين وهي منتشرة كتير من زمان لكنها زادت جداً الأيام دي ألا وهي سرقة شنطة إحدى السيدات في الشارع وفي وضح النهار والسارق سائق دراجة بخارية " موتورسيكل "...!!!

3- سرقة سيارة شقيق زوج بنت عمي ماركة سوزوكي بعد ما ركنها ونزل هو وزوجته للتمشية بجوار سور الكلية الحربية بعد إفطار ثالث أيام رمضان .

4- دي بقى اللي غريبة جداً وسمعتها بأذني , في مسجد الصديق القريب من بيتي , رحت أحجز لبنتي في المركز التعليمي المُلحق بالمسجد " ثانوية عامة العقبى لأولادكم " وأنا في غرفة مدير المركز باكتب استمارة البيانات لقيت العاملة المسئولة عن البوفيه بالمركز بتستغيث بالمدير إثر سرقة الغلاية الكهربائية وعهدتها من الأكواب والشاي والسكر والبُن ...!!!

5- سرقة احدى سيارات الشركة التي يعمل بها زوجي من مدينة السادات حيث صفَّ السائق السيارة ماركة جيب شيروكي أمام إحدى مزارع الدواجن الخاصة بالشركة ودخل ومن معه للمزرعة ورجع فلم يجد السيارة ...!!

6- كنت رايحة أفطرعند شقيقتي وبطبيعة الحال رحت أشتري طبق حلويات ماهو مش معقول هاروح بإيدي فاضيه , الساعة كانت حوالي الواحده ظهراً , دخلت محل مونجيني بشارع سيد زكريا خليل بمساكن الشيراتون اشتريت الحلويات وخرجت لقيت ضجة وزحمة كبيره في الشارع , سألت قالوا واحد ركن عربيته ونزل البنك " بجوار محل مونجيني يوجد إحدى فروع بنك hsbc " خرج الرجل من البنك بعد ربع ساعة ملقاش عربيته .....!!!!



هو في ايه ...؟؟؟!!! 

بالورقة والقلم

عارفة سواد العسل ...؟؟
أهو ده اللي حالك له وصل !!!!
إزاي قوليلي مكملة ...؟؟؟
وكل ده فيكي حصل ...!!!!

بشرى سارة

الآن


وبعد تلك الأحداث المُتفجّرة المتتالية وأخص بالذكر


جمعة " خُدلك جنب ياض إنت وهو "

أحداث العريش

التفجير الخامس لخط الغاز

أحداث العتبة والموسكي

أحداث بولاق أبو العلا



أحب أبشّركم إننا



ضايعين


ضايعين


ضايعين

ملحوظة : وضعت أخر الأحداث والتي حصلت في ال 24 ساعة السابقة عن اليوم 31\7\2011 فقط لا غير

90 دقيقة

من كام يوم كنت باتفرج على برنامج 90 دقيقة اللي كان بيقدم مناظرة بين سيدة من معتصمي ميدان روكسي وفتاة لا تتعدي الخامسة والعشرين من معتصمي ميدان التحرير .

شمل اللقاء عرض لمطالب معتصمي التحرير وروكسي وتخلله بعض الإتهامات من كلا الجانبين للجانب الآخر أنتم من فلول النظام بل أنتم من تخربون البلد وتوقفون عجلة الإنتاج , أنتم منتفعي مبارك بل أنتم العملاء والخونة ..... ألخ ألخ ألخ من قائمة الإتهامات التي يتبادلها الطرفان من بداية أحداث يناير وحتى وقتنا هذا .


ما أحزنني بالفعل هو سلوك فتاة التحرير وطريقتها في الحديث والتي اتسمت بالغرور والإستخفاف والتهكم والسخرية من حديث سيدة روكسي بل وحتى من حديث المذيعة نفسها " ريهام السهلي " .
بالإضافة إلى جلسة فتاة التحرير التي تنم عن غرورها واستعلائها الكبيرين حيث جلست تضع ساق على ساق تهز ساقها بطريقة استفزازية وكلما تكلمت سيدة روكسي قامت الفتاة بالضحك ملىء فاها بسخرية واستهزاء متناهي .

حقيقة كانت مستفزة إلى أقصى الحدود , بئس من أختار معتصمو التحرير للتحدّث نيابة عنهم .

على هامش محاكمة مبارك

من ينظر إلى سيناريو محاكمة الرئيس السابق مبارك يجد أن كل ما يحدث ويُقال ويُنشر سواء من صور أو أخبار في الجرائد اليومية والأسبوعية أو حتى على الجرائد والمواقع الإليكترونية وما يُعلن ويُذاع في الفضائيات والقنوات الأرضية المسموع منها والمرئي هي أخبار تصل بالقارىء والسامع والناظر إلى نتيجة واحدة ........

أن الرئيس السابق مازال موجود في مصر وأن محاكمته وزوجته وولديه قائمة على قدمٍ وساقٍ وأنهم قريبا سينالون من العقاب ما يستحقون بل وزيادة كرامة لعيون المصريين ,,,,!!!

ولكن من يُمعن النظر في تلك الأخبار والروايات ويدقق برهة في الصور المنشورة لنجليّ الرئيس السابق يجد حقيقة مخالفة تماماً .....

ألا وهي أن كل هذا الكم من الأخبار هي في حقيقة الأمر أخبار مُتضاربة مُتداخلة مُفبركة من نتاج خيال مؤلف السيناريو الذي لا نعلم له حتى اليوم هوية ولا هدف سوى محاولة كسب الوقت والمماطلة في سيناريو المحاكمة واستدرار عطف الشارع المصري مع الرئيس وأبنائه حتى تموت القضية أو يموت أصحابها .


هيهات أيها الكاتب هيهات , فقصة بكاء زوجة الرئيس السابق واحتضانها له بعد أن نالت الحكم بإخلاء سبيلها من تهمة الكسب غير المشروع وقولها : عقبالك يا محمد , ثم تلك الصور المُفبركة لنجلي مبارك في ملابس السجن البيضاء التي أمعنت في تشويه جودتها حتى لا يُكتشف أمر تزويرها ,وحكاية بكاء الطفل عمر علاء مبارك في غرفة جده بمستشفى شارم الشيخ وسؤاله للجد عن والده قائلا : بابا فين يا جدو هو وحشني قوي , أما الطامة الكبرى فهي استعلاء واستقواء السيدة هيدي راسخ زوجة علاء مبارك على مثيلتها السيدة خديجة الجمّال ونعتها بوش النحس على العائلة هي ونجلتها فريدة جمال مبارك !!!

هناك قصص وأخبار وشطحات خيال أكثر من هذا بكثير إنما ذكرت قدراً ضئيلاً مم يُكتب ويُقال حتى لا أطيل على القارىء أنا الأخرى فيمل مني كما مل المصريون من هذا السيناريو الهابط ....

ما ذكرت هنا وما لم أذكر لا يعدوا كونه حدوتة قديمة مُملة " إتهرست في تلتميت ثورة قبل كده " وعلشان اتهرست في تلتميت ثورة قبل كده فمحدش هيفكر إنها ممكن تتعاد تاني .....

أو هكذا يظن كاتب السيناريو الذي لا بُد وأن ينكشف في يومٍ لا أظنه سيكون بعيدا .

مُقتطفات

معتصمو السلام الجالسون أمام مبنى ماسبيرو منذ قرابة الشهر لم تُلبى مطالبهم حتى اليوم ...!!!

أعتقد أنهم لو طلعوا على أقرب خط سكة حديد وقطعوه وعلى المحلات والمولات اللي حوالين ماسبيروا وكسروهاهيلاقوا ألف مين يستجيبلهم


اصل البلد دي خلاص عيارها فلت محدش هياخد حقه فيها غير بالدراع


زمن الاعتصامات والمظاهرات السلمية خلاص انتهى


وحكومتنا دلوقتي تخاف متختشيش

 






وصف وثيقة حقوق الإنسان اللي طرحها البرادعي بالفوق دستورية والكلام الواو يعني اللي محدش قاله قبل كده ولا حد قدر يتوصل للعبقرية دي هو في رأيي تملق ومداهنة ومفاخرة في غير موضعها


اللي يسمع كده يقول إنه جاب التايهة ايش حال ان مكانش كل اللي مكتوب هو ألف باء حقوق إنسان


لكن المصريين فعلا ميقدروش يعيشوا بدون ما يتركبوا


بدون ديكتاتور يديهم على قفاهم ويقولو


كامااااااان


آاه يا بلد متنفعش تعيش بدون فرعون





كلما تلفّت حولي هذه الأيام وجدت عدد لا بأس به من سيارات تحمل لوحاتها المعدنية أرقام وشعار الجماهيرية " الجماهيرية العربية الليبية " أينما ذهبت أراها وكلما رأيتها ينشرح قلبي وتقرّ عيني وتتراقص بسمتي على وجهي ....

مازلتِ حبيبتي الملجأ الآمن لكل العرب .

مازلتِ وجهة المفزوع وملاذ كل من فقد الوطن .

مازلتِ أنتِ حبيبتي
أم الجميع

فوق الجميع

ضد الثورة

تصاعدت  في الشهر الأخير وبالتحديد بداية من شهر مايو حدة نبرة المصريين في الحديث عن ثورة 25 يناير , وبدأ البعض يشير لها بأصابع المسئولية عما يحدث في الشارع المصري من أحداث متلاحقة تتسم جميعها بالعنف سواء على المستوى الطائفي او على مستوى الفردي المتمثل في علاقة الناس ببعضهم البعض من خلال تعاملاتهم اليومية  .

وفضلا عن اتهام الثورة بأنها كانت السبب في حالة الخلل الأمني  التي نعاني منها جميعا قام البعض بتفتيح ملفات الثورة القديمة " أي منذ بداية نشوبها " مفخماً بعض الأحداث السلبية التي تسىء للثورة والثوار كاعتداء بعض الثوار على عربات الأمن المركزي واستفزازهم لجنوده , أو ركوب بعض المعارضين لموجة الثورة وتحدثهم باسم الشعب دون تفويض أو توكيل , وحالة الاستعلاء التي انتابت بعض شباب الثورة صبيحة تنحي مبارك واحساسهم أنهم هم من أتى بالنصر المُبين وأنهم دون باقي فئات البشر .....

باختصار شديد ظهرت على الأفق حالة من النفور الشعبي من ثورة يناير التي بات الناس اليوم يصفونها بالنكسة لا الثورة ومن ترفّق بها وبمن قاموا عليها قال أحداث 25 يناير  !!!

وصار جلياً أن حالة النفور تلك باتت تزيد رقعتها حتى شملت جميع محافظات مصر ونسبة غير ضئيلة من فئات الشعب .......

 لا ريب أن من يقرأ كلامي هذا سوف يتهمني بمعاداة الثورة وموالاة النظام السابق بل ووصفي بالنفاق وأنني من مستفيدي مُبارك وزبانيته ولهؤلاء أقول أن هذا سبب جديد لحالة النفور من الثورة التي انتابت فئة كبيرة كلما انتقدت الثورة وتحدثت بصراحة عن مساوئها قوبلت بالاتهامات والادعاءات ووضعت بين خيارين أحلاهما مُر إما الصمت أو الرشق بسهام الاتهامات الزائفة  .

بعيدا عن هذا وذاك دعونا الآن نعلم لماذا هم ضد الثورة ...؟؟

ما إن استيقظ الشعب صبيحة تنحي مبارك حتى وجد نفسه قد قُسّم رغم أنفه إلى نصفين إما مع الثورة أو ضدها ووجد أن هُناك قوائم سُميت بقوائم العار أفرد لها الثوار صفحات وصفحات على شبكة الإنترنت والجرائد والمجلات فأرغم رغم أنفه على اختياراحد الجانبين مع الثورة أوعلى قوائم العار .

حين رأى الناس أن الوضع على الساحة الإعلامية  لم يتغير البتة وأن حالة النفخ الإعلامي مازالت تعمل على قدمٍ وساق بالأمس كانوا ينفخون في الملك القديم واليوم أصبح النفخ للملك الجديد دون استحياء , وأن الثوار لم يعد يشغلهم شىء سوى التحدّث على الشاشة سواء في المحطات التليفزيونية الفضائية كانت أو الأرضية أو في المحطات المسموعة كالقنوات الإذاعية المختلفة  فَرحين بهذا الفتح الإعلامي غاضين الطرف عن أن تلك القنوات التي تتبارى في استضافتهم اليوم هي نفسها القنوات التي تبارت في تشويه صورتهم واتهامهم بالعمالة والخيانة بالأمس القريب , حتى أصبح لا يمر على الناس يوم من دون أن يسمعوا صوت على الأقل أحدهم او يروا وجهه على إحدى تلك القنوات والغريب انهم لا يقولون جديدا .

حين اختزلت الثورة كل مهامها ودورها على محاكمة النظام السابق بجميع رؤسه من أصغرها لأكبرها وأفردت لذلك المليونيات الجمعة تليها الجمعة وكأن بينها وبين هؤلاء ثأر بائت لا هم لها ولا طائل سوى تخليصه ولو خلّصته على جثة هذا البلد .

وفي نفس الوقت نجدها قد غضت الطرف عن المظاهرات الفئوية وعن تعطيل عجلة العمل فلم نجد أحدهم قد دعى يوما لمليونية أو حتى وقفة تستنكر تلك المظاهرات أو ذهب بنفسه للتحدث مع هؤلاء الثائرين واعداً ومُبشراً إياهم بالفرج القريب ومُنبها تلك الجموع بخطورة تلك الوقفات على استقرار مصر .

يوم أن اختارت الثورة من يحكم مصر ويسّير أمورها دون النظر إلى كفائة أو خبرة , فقط لأنه كان أحد من وقفوا في ميدان التحرير يوما .   

حين رأينا وسمعنا من اعتبرتهم الثورة اكبر معاونيها والمُتحدثين دائماً بصوتها يتبارزون على شاشات الفضائيات بأنبى وأقذع الألفاظ لا لإثبات شىء سوى أن كل منهم هو الأفضل والأطهر يد من الآخر رغم أن الجميع يعلم أنهم في الوضاعة سواء , بل أن بعضهم قام ببث قنوات خاصة " لا نعلم من أين له بتمويلها ! " والقيام بنفسه أو عن طريق استجلاب أكبر إعلاميّ مصر بإفراد الساعات والساعات من وقت القناة للنيل من كل من يُعاديه أو حتى " يدوس له على طرف " .

يوم لم تجد الثورة سبب لحالة الانفلات الأمني والاحتقان الطائفي وكل ما يحدث في مصر سوى " فلول النظام , الحزب الوطني , أمن الدولة " وباتت ترمي بكل مصيبة تحدث في هذا البلد على عاتق هؤلاء مُذكّرة الشعب بالنظام القديم وكبشا فداه" السيد ماس كهربائي والمدعوا مختل عقلياً " الذي قد صدّع بهما رؤسنا وبتنا نعلم أن المتهم هو أحدهما حتى قبل الإفصاح عنه  .

وللحديث بقية

مسكنات ... مسكنات

اللي حصل في قنا ده بيقول كلام خطييييير

بغض النظر عن انهم كانوا معترضين على المحافظ علشان مسيحي او علشان كان بيعمل في جهاز أمن الدولة .....

طريقة اعتراضهم على المحافظ أي كان السبب في الإعتراض بتقول ان مصر هتُدار بالشكل ده في أي حاجه .....

 كل اللي مش هيعجبه حد رئيس كان أو وزير أو محافظ أو حتى مدير مؤسسة هيعترض ويتظاهر

 اعتراضه مجابش نتيجة هيعتصم

 اعتصامه مجابش نتيجة هيبدأ يعطل مصالح الدولة والمواطنين ومن ثم هيخرّب كل اللي يجي تحت ايده من محلات وسيارات وممتلكات فردية أو حكومية !!!!!

أما طريقة العلاج المتمثلة في تجميد عمل المحافظ فهي تشير إلى أن الحكومة المصرية الحالية غير قادرة على عمل شىء سوى مداواة مريضها بالمسكنات .

الله وحده يعلم إلى أين ستودي تلك المسكنات بالمريض , لكن لو أخذنا بالأسباب سنجد أننا ................

.........داخلين على مرحلة سوداء من تاريخك يا مصر

يا افتكاساتك يا حمدين !!!!

ذكر الأستاذ حمدين صباحي المرشح لرئاسة الجمهورية في حواره مع طلاب كلية التجارة جامعة الأزهر أنه في حالة فوزه بالرئاسة سيسيركل شىء في مصر بالإنتخاب بداية من رئيس الجمهورية وحتى العمدة



ولازم ناخد بالنا كويس من الجملة الأخيرة دي بداية من رئيس الجمهورية حتى عمدة القرية , وده طبعا هيشمل المحليات والمحافظين ورؤساء المؤسسات وشيخ الأزهر وعمداء الجامعات وووووووووو والبلد كلها هتمشي بالإنتخابات

وبكده يكون شعار المصريين في المرحلة المقبلة رايح فين يا شعب مصر رايح الإنتخابات جاي منين يا شعب مصر جاي من الإنتخابات



يا نهار أزرق على الافتكاسات

من قتل جون كنيدي ...؟؟؟

نتيجة لحوار مطوّل بيني وبين مجموعة من الأقارب والأصدقاء موضوع الحوار كان عن التأجيلات المتتالية والغير مُبررة لمحاكمات كبار الفاسدين توصلنا لتحليل نحسبه صحيح إذ ليس هناك مبرر واضح لتلك التأجيلات وكل ما يُذكر من أسباب لا
" يدخل عقل عيل " .


نص التحليل الذي اتفقنا عليه جميعا وأيدناه كان كالتالي


هم بس مستنيين واحد يموت ويشيلوه الليلة كلها وخصوصا أن المؤشرات كلها بتشير إلى اقتراب أجل أحدهم فمعظمهم عدى السبعين سنة وجميعهم من ذوي الأمراض ومنها المستعصي ......

 بمعنى لو مات مبارك مثلا هو اللي هيشيل كل التهم اهدار مال عام على استغلال نفوذ على قتل متظاهرين على ..... ألخ ألخ


ده يمكن كمان يشيلوه تهمة اغتيال جون كيندي والتخطيط لقتل ديانا

أداء حكومي رفيع

امبارح
البلطجية نزلوا الإستاد
يبقى نلغي الدوري ونلغي الماتشات ونلغي النشاط الرياضي بأسره

بكره
البلطجية ظهروا في السينما

يبقى نلغي السينما ونلغي الأفلام ونلغي النشاط الفني بأسره

البلطجية ظهروا عند المدرسة الفلانية
يبقى نلغي المدرسة ونلغي التلاميذ ونلغي العملية التعليمية بأسرها

<
<
<
<
<
<
<
<
<
<
<

البلطجية ظهروا في الشارع
يبقى نلغي الشارع 


أداء حكومي رفيع


رفيع رفيع يعني


 


 

اشتغلت

امبارح


ماشية أنا وبنتي في عربيتنا في أمان الله أنا سايقة وهي قاعده جنبي رايحة أوصلها درس في ألماظة , للعلم بنتي عندها 16 سنة ....
قريب من مستشفى الجلاء لقيت اتنين في عربية سوزوكي الربع نقل دي بس متغطية .
اتنين رجالة في الأربعينات تقريبا واحد سايق والتاني قاعد جنبه ...


المهم
الراجل اللي سايق بص لبنتي بقرف كده وبصراحة بصلي انا كمان ,, آه صحيح بنتي مش محجبة وأنا يعني لابسة طرحة اقدر اقول على نفسي ملتزمة  " شوية :) " .


نرجع لموضوعنا الراجل بعد ما بصلنا أنا وبنتي بقرف زي ما ذكرت رجع كلم التاني اللي جنبه اللي بدوره أعطى له شىء معرفهوش , ومعرفتهوش غير لما رماه على بنتي من شباكها بمنتهى العجرفة وقلة الذوق وهو تقريبا بيشخط فيها وبيقول : ابقى اقري دول يا أخت .


البنت طبعا ماتت من الخضة من طريقته وأسلوبه الفظ , وفي رد فعل سريع كانت هترجع ترميله الحاجة اللي رماها علينا عليه مرة تانية , لولا انه أسرع وجري بعربيته بعد ما رماهم على طول .


ايه بقى اللي رماه عم القرفان ده ..؟؟


 كُتيّب صغير عنوانه  ( أختاه .. وقفة مع النفس جمع وترتيب محمود المصري ) وبداخله نوتة عبارة عن ورقة متطبقة عنوانها ( حكم لبس المرآة للبنطلون ) , أنا وبنتي على فكرة كنا لابسين بنطلونات .


المهم في الموضوع هو مش اعطى لنا ايه دي أنا مش معترضه عليها بل بالعكس بدعيله كتر خيره ربنا يجازيه خير ويديله على قد نيته , المهم الطريقة والإشمئزاز اللي بصلنا بيه والعجرفة اللي كلمنا بيها والعنف اللي رمى لنا بيه الكُتيّب حتى إنه وهو بيرميه جه في وش البنت ولولا ستر ربنا كان ممكن يعورها من كتر ما رماه بعنف .


انتم اشتغلتم بقى والا ايه ...!!


اللهم لا اعتراض لكن لما تشتغلوا اشتغلوا بالحكمة والموعظة الحسنة اللي ذكرها ربنا في قرآنه


ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ (125)(النحل125)


شويه نلاقيكم بتجروا ورانا بالكرابيج والعصي


والا ايه ..؟؟

آه يا مصر

الشغالة عندي ست بصمجية ساكنة في منطقة المرج , النهاردة بهرج معاها بقولها استفتيتي يا نورا ..؟؟ " على اعتبار انها هترد تقولي يعني ايه استفتيتي دي يا مدام ..؟ "

فوجئت بيها بتقول : آه طبعا استفتيت وقولت آه يا مدام انتي عاوزاهم ياخدو البلد مننا

سألتها مين دول : قالتلي البُعدا ......


عم أبو أحمد البواب كمان بصمجي لما سألته بتهريج برضوا : استفتيت يا عم ابو احمد .

رد : آه طبعا رحت علمت على العلامة الخضرا عشان المسلمين , عشان الدين والإسلام .


السؤال الآن

من الذي دفع بتلك الفئة أن تقول آه أو تعلّم على العلامة الخضرا ..؟؟؟


رغم أنني قلت نعم ورغم فوز من قالوا نعم إلا أنني أخاف كثيرا من تلك النعم على ملامح مستقبل مصر